Disa aktivistë kanë hequr flamurin gjerman nga një shtizë përpara ndërtesës së Parlamentit të Gjermanisë (Bundestag) dhe në vend të tij kanë vendosur flamurin palestinez.
Ky veprim është bërë në shenjë proteste kundër qëndrimit të qeverisë gjermane ndaj luftës së Izraelit në Rripin e Gazës. Aktivistët kanë kundërshtuar mbështetjen e Gjermanisë për Izraelin, duke dënuar sulmet dhe vrasjet e civilëve palestinezë në Gaza.
Pas ngjarjes, policia e Berlinit ka ndërhyrë dhe ka arrestuar tre persona të përfshirë në incident.
Autoritetet gjermane kanë nisur hetimet ndaj tyre, pasi dyshohet se me heqjen e flamurit kanë shkelur ligjin që mbron simbolet kombëtare të Gjermanisë.
Ngjarja vjen në një kohë kur në Gjermani vazhdojnë protestat dhe kritikat ndaj politikës së qeverisë për luftën në Gaza.
