Presidenti amerikan Donald Trump ka deklaruar se një sulm i ri ushtarak kundër Iranit është shumë pak i mundshëm, nëse Teherani pranon një marrëveshje për programin bërthamor dhe rihapjen e Ngushticës së Hormuzit.
Në një intervistë për CNN, Trump theksoi se SHBA-ja preferon një zgjidhje diplomatike, por paralajmëroi se ushtria amerikane është e përgatitur për çdo skenar.
“Jemi gati. Kemi tre aeroplanmbajtëse në rajon, plotësisht të pajisura dhe të gatshme për veprim”, deklaroi ai.
Presidenti amerikan pretendoi se sulmet e mëparshme kanë dobësuar rëndë kapacitetet ushtarake të Iranit, duke shtuar se SHBA-ja ka mundësi t’i japë vendit një goditje përfundimtare.
Trump paralajmëroi gjithashtu se ushtria amerikane ka identifikuar objektiva të mundshëm në Iran, përfshirë ura dhe centrale elektrike, por theksoi se nuk dëshiron shkatërrimin e infrastrukturës civile.
Pavarësisht tensioneve, ai u shpreh se një ndërhyrje e re ushtarake mund të shmanget nëse arrihet marrëveshja.
“Me shumë gjasa, nuk do të jetë e nevojshme. Ata duan me dëshpërim të arrijnë një marrëveshje”, përfundoi Trump.
