Partia Demokratike duket se këtë herë po përpiqet vërtet të tregojë se protestat kundër qeverisë nuk janë më thjesht premtime në mikrofon. Në selinë blu është thirrur një mbledhje me të gjithë kryetarët e degëve të PD, një sinjal se diçka mund të lëvizë.
Nga selia blu, i vetmi që foli për mediat ishte kryebashkiaku i Kavajës, Fisnik Qosja, i cili me bindje deklaroi se ka ardhur momenti që demokratët të protestojnë për gjithçka që po ndodh në vendin tonë.
“Jemi pro protestës, është momenti të protestojmë për gjithçka që po ndodh në Shqipëri. Jemi pro! Në një linjë me Kryesinë”, tha Qosja.
Ndërkohë, deputetët demokratë duket se i kanë dhënë më shumë peshë takimit në seli sesa punës parlamentare. Në disa komisione u paraqitën vetëm për pak minuta dhe u zhdukën, ndërsa në atë për Reformën Territoriale munguan krejtësisht.
-
Opozita rikthehet në komisione, por “harron” Reformën Territoriale
11 Nëntor, 12:50
Sali Berisha, pas mbledhjes së gjatë të grupit parlamentar mbrëmë, paralajmëroi se protestat do të rifillojnë, por si zakonisht pa dhënë asnjë datë konkrete. Deri tani, protestat e paralajmëruara kanë qenë më shumë pjesë e retorikës së tij mediatike sesa e realitetit në terren.
Megjithatë, me zhvillimet e sotme, duket se PD po përgatitet të shpallë një datë, ndoshta edhe për shkak të “nxitjes” që Berisha mori nga thirrja e tij për 21 Janarin në SPAK, një arsye më shumë për të dalë në rrugë dhe për ta marrë më seriozisht këtë herë.
