Bejkotimi i Komisioneve Parlamentare nga Partia Demokratike zgjati sa një pushim kafeje politike. Vetëm një ditë pas urdhrit të Gazment Bardhit për t’u larguar nga komisionet në shenjë proteste, deputetët demokratë janë rikthyer sërish në punë, duke e lënë “në harresë” vendimin e kreut të grupit.
Bardhi kishte shpallur bojkotin të dielën në mbrëmje, përmes një mesazhi drejtuar deputetëve, ku e cilësonte këtë si një reagim ndaj situatës së krijuar në Kuvend. Të hënën në mëngjes, demokratët zbatuan me përpikëri urdhrin, duke munguar në Komisionin e Ekonomisë dhe në atë të të Drejtave të Njeriut.
Por “kauza” opozitare zgjati pak, pasi sot deputetët u rikthyen në komisione, si të mos kishte ndodhur asgjë. Një tjetër episod që tregon mjegullën strategjike brenda Partisë Demokratike, ku vendimet politike shpallen me zhurmë, por zbehen në më pak se 24 orë.
