Komisioni i Reformës Territoriale nisi sot punimet, por karriget e Partisë Demokratike mbetën bosh sërish. Edhe pse kjo është një nga nismat më të rëndësishme që opozita vetë e ka kërkuar me ngulm, deputetët demokratë zgjodhën të mos paraqiten.
Në sallë përballë socialistëve, u ulën vetëm dy përfaqësues nga partitë aleate të PD, Edmond Haxhinasto i Partisë së Lirisë dhe Vangjel Dule i PBDNJ-së. Pjesa tjetër e opozitës mungoi, pa asnjë shpjegim publik.
Duhet theksuar se këtë herë bojkoti nuk lidhet me “urdhrin” e Gazment Bardhit për mospjesëmarrje në komisione, pasi në shumicën e tyre deputetët demokratë ishin të pranishëm. Kjo ngre pyetjen e thjeshtë, a kemi të bëjmë me një bojkot politik apo me një “keqkuptim” mes vetë demokratëve?
Nëse një pjesë e grupit ndjek urdhrat e Bardhit dhe tjetra bën sikur s’ka dëgjuar gjë, atëherë opozita po i shton konfuzionit të saj edhe një rast tjetër për t’u marrë me veten. Në çdo rast, PD do të duhej të sqarojë pse mungon në komision që vetë e kërkoi dhe ishte e pranishme në pjesën tjetër.
