Protesta e opozitës në Tiranë ka vijuar me marshimin e protestuesve nga godina e Kryeministrisë drejt Drejtorisë së Përgjithshme të Policisë së Shtetit, në zbatim të skenarit të paralajmëruar nga organizatorët. Në krye të protestuesve ndodhej kreu i Partisë Demokratike, Sali Berisha, i shoqëruar nga deputetë të kësaj force politike.
Gjatë marshimit janë hedhur molotovët e parë nga protestuesit, të cilët i vunë zjarrin disa kazanëve të mbetjeve në rrugë. Në përgjigje të situatës, një kordon i madh policie është vendosur në afërsi të Drejtorisë së Policisë, për të ndaluar përparimin e turmës dhe për të garantuar sigurinë e institucionit.
Policia e Tiranës kishte njoftuar më herët se nuk merrte përsipër organizimin e protestës, ndërsa kishte marrë masa të shumta për ruajtjen e rendit dhe institucioneve. Rreth 1,300 forca policore janë vendosur në gatishmëri, ndërsa në terren ndodhen autobote me ujë, mjete zjarrfikëse dhe ambulanca për çdo eventualitet.
Gjatë fjalës së tij, Berisha deklaroi se protesta e sotme është një marshim revoltë për të shprehur zemërimin popullor ndaj qeverisë dhe kryeministrit Edi Rama.
“Sot ka formën e një marshimi revoltë proteste në rrugët e Tiranës. Po shprehet zemërimi popullor ndaj kreut të organizatës kriminale të qeverisë shqiptare dhe anëtarëve të saj. Për t’i thënë Ramës që jo një, por edhe 30 të largosh, do të jesh ti objekt kryesor i revoltës popullore,” u shpreh Berisha.
