Raportet financiare të siguruara nga VNA për zgjedhjet e pjesshme të 9 nëntorit vizatojnë një skenë politike që ngjan më shumë me një mbledhje vullnetarësh sesa me një garë elektorale për pushtet. Ajo që bie në sy menjëherë është "modestia" financiare, veçanërisht në radhët e opozitës, ku fushata duket se është zhvilluar më shumë me vullnet të mirë sesa me buxhet.
Ata që humbën 5 me 0 përballë kandidatëve të Edi Ramës, me sa duket kanë qenë të bindur që në nisje të garës, dhe thuajse nuk kanë lëvizur as gishtin për financime.
Partia Demokratike zyrtarisht nuk mori pjesë, kandidatët e pavarur që u mbështetën rreth saj deklarojnë shifra që sfidojnë logjikën e një fushate reale.
Partia Socialiste thotë se veç kandidatëve të saj, selia qendrore ka vënë në dispozicion 2640 euro, ku ka pasur vetëm një sponsor nga Vlora 300 Euro, me emrin Ina Nebia.
Anëtarësia në Vlorë dhuroi 1400 Euro nga kuotat, kurse ajo e Matit 600 Euro. Këto para janë përdorur 1400 euro për promocion dhe transport 840 euro.
PD nuk ka dorëzuar një raport financiar, sepse ajo zyrtarisht nuk mori pjesë në zgjedhje por mbështeti për së largu kandidatët e pavarur.
*Shpenzimet e kandidatëve*
_(Bashkia Berat)_
Në Berat vihet re një kontrast i skajshëm mes kandidatit të mazhorancës dhe atij të pavarur që u mbështet nga opozita.
Ervin Ceca (PS): Ka operuar me një buxhet modest prej 495 Euro, të cilat i ka siguruar përmes vetë-donacionit. Me këtë shumë ai pretendon ka arritur të mbulojë koston e mitingjeve dhe transportin përkatës, duke i shpenzuar të gjitha fondet.
Pavllo Shkarpa (I pavarur/PD): Paraqitet me një bilanc zero. Ai nuk ka deklaruar asnjë të ardhur dhe asnjë shpenzim, duke sugjeruar një fushatë krejtësisht vullnetare ose mungesë aktiviteti financiar zyrtar.
_(Bashkia Cërrik)_
Në Cërrik, gara financiare tregon një kandidat që ka teprica fondesh dhe një tjetër pa buxhet.
Florenc Doka (PS): Nga 700 Euro të siguruara nga fondet personale, ka shpenzuar më pak se gjysmën (279 Euro). Shpenzimet e tij janë të specifikuara: një pjesë e vogël për konsum (29 Euro bar-kafe), 50 Euro për karburant dhe pjesa më e madhe (200 Euro) për materiale promovuese.
Amarildo Hoxha (I pavarur - Lapaj): Njësoj si në rastin e Beratit, kandidati i pavarur ka deklaruar zero të ardhura dhe zero shpenzime.
_(Bashkia Mat)_
Mati paraqitet si një zonë me aktivitet më të lartë financiar, ku janë përfshirë tre kandidatë.
Altin Bojni (PS): Mbart buxhetin më të lartë në këtë listë me 5,000 Euro (vetëfinancim). Ka shpenzuar 4,280 Euro, ku peshën kryesore e mbajnë materialet promocionale (2,700 Euro), pasuar nga transporti (1,000 Euro) dhe tubimet (400 Euro).
Suzana Pasha (E pavarur): Ka investuar 1,000 Euro nga paratë e saj, duke i dedikuar të gjitha ekskluzivisht për media.
Eduard Brahilika (I pavarur/PD): Ka vetëfinancuar 1,380 Euro, të cilat i ka orientuar kryesisht drejt kostove të transportit.
_(Bashkia Vlorë)_
Vlora shfaq investime të konsiderueshme, veçanërisht në marketingun digjital dhe infrastrukturën e zyrave.
Brunilda Mersini (PS): Ka deklaruar 5,000 Euro të ardhura personale, nga të cilat ka shpenzuar 2,717 Euro. Ajo ka investimin më të lartë të deklaruar për rrjetet sociale (1,500 Euro), ndërsa pjesa tjetër ka shkuar për salla hotelesh (430 Euro) dhe zyra elektorale (510 Euro).
Dionis Sota (I pavarur/PD): Ka një strukturë interesante të ardhurash prej 1,580 Euro, ku përfshihen donacione nga Tirana (1,000 Euro) dhe nga SHBA (387 Euro). Fondet janë përdorur për media dhe zyra.
_(Bashkia Tepelenë)_
Në Tepelenë, vërehet një fokus i qartë te logjistika dhe transporti për shkak të terrenit.
Gramos Sako (PS): Ka dhuruar 1,000 Euro për veten dhe ka shpenzuar 870 Euro. I gjithë ky buxhet është përdorur vetëm për transport.
Gabriel Guma (I pavarur/PD): Ka një shpenzim të lartë prej 3,770 Euro nga fondet personale. Pjesa dërrmuese (2,700 Euro) ka shkuar për transport, ndërsa pjesa tjetër për rrjetet sociale.
