Gjykata Kushtetuese e Shqipërisë ka vendosur të kalojë për shqyrtim në seancë publike kërkesën e paraqitur nga jo më pak se një e katërta e deputetëve të Kuvendit, lidhur me mosmarrëveshjen e kompetencës për ngritjen e komisioneve hetimore parlamentare.
Kërkesa lidhet me detyrimin e Kuvendit për ngritjen e Komisionit Hetimor mbi veprimet e zyrtarëve shqiptarë në raport me ish-agjentin e FBI-së Charles McGonigal, si dhe Komisionit Hetimor për kontrollin e përdorimit të burimeve shtetërore për qëllime elektorale në zgjedhjet e 11 majit 2025.
Deputetët kërkojnë gjithashtu që të shpallen antikushtetuese vendimet e Kuvendit nr. 77/2025 dhe nr. 78/2025, të cilat refuzuan ngritjen e këtyre komisioneve, si dhe shfuqizimin e disa vendimeve të Gjykatës së Posaçme të Apelit dhe Kolegjit Penal të Gjykatës së Lartë, me argumentin se bien ndesh me Kushtetutën.
Kalimi i çështjes në seancë publike sinjalizon një fazë të re në përplasjen institucionale mes opozitës, shumicës parlamentare dhe sistemit të drejtësisë, duke vendosur në qendër të vëmendjes rolin e Kuvendit në kontrollin parlamentar, kufijtë e kompetencave të tij dhe standardet kushtetuese për komisionet hetimore.
