Partia Demokratike ka shpallur zyrtarisht kandidaturën e aktorit të njohur Florjan Binaj për zgjedhjet e parakohshme në Bashkinë e Tiranës.
Lajmin e bëri publik kryetari i PD-së, Sali Berisha, në një deklaratë për mediat nga selia blu. Ai e cilësoi Binajn si një personalitet të artit dhe një mbrojtës të kauzave qytetare.
“Jam sot këtu për t’u informuar ju dhe qytetarët e Tiranës, dhe mbarë Shqipërisë, se PD, duke falënderuar me mirënjohje secilin prej atyre që vendosi të paraqesë kandidaturën e tij në shërbim të qytetarëve të Tiranës, informon se grupi i mandatuar do t’u paraqesë aleatëve tanë mendimin dhe sugjerimin që të mbështesim së bashku artistin e mirënjohur, komunikatorin e talentuar, zotin Florjan Binaj,” tha Berisha.
Ai shtoi se shpreson që e gjithë opozita të bashkohet rreth kësaj kandidature, duke e konsideruar Binajn si një figurë me reputacion të gjerë dhe të afërt me qytetarët.
“Florjan Binaj është nga ata artistë që konsideron kauzat qytetare si kauzat e tij,” theksoi Berisha, duke kujtuar edhe suksesin e tij ndër vite si pjesë e shfaqjes më të ndjekur televizive në vend.
Kreu i PD-së, i pyetur në lidhje me personin apo grupin që do të drejtojë fushatën elektorale në Tiranë, tha se kjo është në dorën e kandidatit që PD do të mbështesë, pra Florjan Binaj.
Berisha u shpreh megjithatë se PD dhe opozita janë të gatshëm që të vënë në dispozicion të gjithë potencialet që kandidatit do t’i nevojiten.
“Asnjë hap nuk mund të ndërmerret pa kandidatin, dhe do të jetë kandidati që do të kërkojë ndihmën nga forca jonë politike dhe nga forca të tjera të opozitës. Të gatshëm të angazhojmë të gjithë potencialet tona që kandidati gjykon se i shërbejnë fitores së tij,” tha Berisha.
