Deputeti i opozitës, Belind Këlliçi, ka reaguar pas publikimit të listës së personaliteteve kombëtare të muajit tetor nga Kuvendi i Shqipërisë, ku përfshihet edhe ish-diktatori komunist Enver Hoxha.
Këlliçi e cilëson këtë veprim si “skandaloz, kriminal dhe të turpshëm”, duke theksuar se është një fyerje e rëndë për mijëra viktimat e komunizmit dhe familjet e tyre.
“Skandaloze, kriminale dhe e turpshme futja e figurës së Enver Hoxhës në listën e personaliteteve kombëtare të muajit tetor nga Kuvendi i Shqipërisë! Diktatori që prodhoi një regjim terrori, shtetin më të izoluar, popullin më të varfër e të shtypur të Europës radhitet ndër figurat e nderuara të kombit, krahas Sulejman Delvinës, Migjenit, Naim Frashërit, Abdyl Frashërit dhe at Gjergj Fishtës,” shkruan ai.
Këlliçi kërkon që Kuvendi të tërheqë menjëherë materialin dhe të kërkojë ndjesë publike, duke kujtuar rezolutat e miratuara për dënimin e krimeve të komunizmit dhe orientimin demokratik të Shqipërisë.
