Një ngjarje tragjike ka tronditur qytetin e Beratit, ku një 42-vjeçar humbi jetën pas një konflikti absurd në Kalanë e qytetit. Viktima, Keli Hoxha, ndodhej aty së bashku me familjen për qëllime turistike, por gjithçka përfundoi në tragjedi.
Sipas dëshmisë së familjarëve të dhënë në polici, konflikti nisi pasi Hoxha kishte prekur me dorë kalin që ndodhej pranë autorit të krimit. Ata theksojnë se i afërmi i tyre nuk e ka sharë apo ofenduar 63-vjeçarin Kristo Mema (i njohur edhe si Konstandin Hoxha), por është sulmuar papritur nga ky i fundit, pasi i kishte thënë vetëm: “S’ka asgjë të keqe.”
Ngjarja ndodhi rreth orës 15:10, ku pas një debati për motive të dobëta, autori goditi me mjet prerës 42-vjeçarin, i cili ndërroi jetë më pas në spital si pasojë e plagëve të rënda.
Policia e Beratit bëri të mundur lokalizimin dhe arrestimin e menjëhershëm të autorit në lagjen Kala, pranë Tabjes, në bashkëpunim me strukturat e Drejtorisë Vendore të Policisë.
