Zbardhet dinamika e ngjarjes së ndodhur një ditë më parë në Bathore, ku mbeti i plagosur me armë zjarri një 24-vjeçar. Policia ka njoftuar arrestimin e autorit të dyshuar, shtetasin Doaldo Bajrami.
Njoftimi i Policisë:
“Identifikohet, kapet dhe vihet në pranga autori i dyshuar i ngjarjes. Vijon puna për gjetjen e armës së zjarrit me të cilën u plagos 24-vjeçari, i cili aktualisht ndodhet jashtë rrezikut për jetën.”
Sipas njoftimit zyrtar, pasditen e djeshme, pas marrjes së informacionit se në spital ishte paraqitur një person i plagosur me armë zjarri, specialistët e Sektorit për Krimet e Rënda në DVP Tiranë, në bashkëpunim me Komisariatin e Policisë nr. 5, organizuan menjëherë punën për zbardhjen e rrethanave të ngjarjes dhe identifikimin e autorit.
Si rezultat i hetimeve, u identifikua dhe u arrestua shtetasi D. B., 24 vjeç, i dyshuar si autor i plagosjes. Ai akuzohet për veprat penale “Vrasja me dashje” e mbetur në tentativë dhe “Mbajtja pa leje dhe prodhimi i armëve, armëve shpërthyese dhe municionit”.
