Edhe pse emri i gjyqtarit Ilir Panda ishte caktuar prej disa ditësh si pjesë e trupës gjykuese që do të shqyrtonte rekursin e Erion Veliajt në Gjykatën e Lartë, konflikti i mundshëm i interesit nuk kishte tërhequr vëmendjen publike.
Ishte VNA që publikoi se Panda ndodhej në një situatë konflikti interesi, pasi më herët ishte tërhequr nga shqyrtimi i një çështjeje të Ajola Xoxës, bashkëshortes së Erion Veliajt, duke deklaruar vetë njohje familjare me të. Në shkrim u ngrit pyetja se si i njëjti gjyqtar mund të ishte pjesë e trupës që do të vendoste për masën e sigurisë së Erion Veliajt, kur konflikti i interesit që kishte pranuar më parë nuk kishte ndryshuar.
Një ditë pas publikimit të këtij shkrimi, Ilir Panda ka paraqitur dorëheqjen nga trupa gjykuese dhe, sipas burimeve, dorëheqja e tij është pranuar.
Tërheqja e gjyqtarit vjen pasi emri i tij kishte qenë prej disa ditësh në përbërje të kolegjit penal, pa u evidentuar publikisht çështja e konfliktit të interesit. Me largimin e Pandës, Gjykata e Lartë pritet të caktojë një tjetër gjyqtar për të plotësuar trupën që do të shqyrtojë rekursin e kryebashkiakut të Tiranës.
Vendimi i kësaj trupe mbetet kyç, pasi do të përcaktojë nëse Erion Veliaj do të vijojë të qëndrojë në paraburgim apo do të përfitojë një masë tjetër sigurie.
