Korpusi i Gardës Revolucionare Islamike (IRGC) ka deklaruar se Ngushtica e Hormuzit është “plotësisht” nën kontrollin e tij, duke kundërshtuar drejtpërdrejt deklaratat e presidentit amerikan Donald Trump.
Në një reagim të publikuar në Telegram, IRGC theksoi se situata në këtë korridor jetik detar është “plotësisht dhe në mënyrë vendimtare” nën kontrollin e marinës së saj dhe se nuk do t’u rihapet “armiqve të këtij kombi përmes teatrit të presidentit amerikan”.
Më herët gjatë së mërkurës, Trump deklaroi se Irani i kishte kërkuar SHBA-së një armëpushim, duke shtuar se një kërkesë e tillë do të shqyrtohej vetëm nëse Teherani rihap Ngushticën e Hormuzit për qarkullimin detar. Ai shtoi gjithashtu se deri atëherë, SHBA-ja “po e shkatërron Iranin” dhe po e kthen “në Epokën e Gurit”.
Megjithatë, nuk ka pasur asnjë konfirmim zyrtar nga Irani për një kërkesë të tillë për armëpushim, ndërsa mbetet e paqartë nëse presidenti iranian ka autoritet të plotë për të negociuar në emër të gjithë strukturës së pushtetit në vend.
Ndërkohë, Trump ka deklaruar më parë se rihapja e Ngushticës së Hormuzit nuk përbën problem për Shtetet e Bashkuara, duke sugjeruar se ajo mund të ndodhë pas përfundimit të konfliktit.
