Një avion i kompanisë Frontier Airlines është përfshirë në një incident tragjik në Aeroportin Ndërkombëtar të Denverit, ku gjatë nisjes nga pista ka goditur dhe ka shkaktuar vdekjen e një personi që ndodhej në zonën e ndaluar.
Sipas autoriteteve të aeroportit, përplasja ka shkaktuar një zjarr të shkurtër në motor, i cili është neutralizuar shpejt nga shërbimet zjarrfikëse të Denver Fire Department. Menjëherë pas incidentit, është vërejtur tym në kabinë dhe të 224 pasagjerët në bord janë evakuuar në mënyrë të sigurt.
Kompania ajrore ka shprehur trishtim për ngjarjen, duke e cilësuar atë si një moment të rëndë për të gjithë të përfshirët.
Ndërkohë, Sekretari i Transportit i SHBA-së, Sean Duffy, deklaroi se avioni po lëvizte me shpejtësi të lartë në momentin e incidentit. Sipas tij, personi i përfshirë kishte hyrë në mënyrë të paligjshme në zonën e aeroportit, duke kaluar rrethimin dhe duke dalë në pistë.
Autoritetet theksojnë se hyrja pa leje në zonat e aeroportit përbën rrezik serioz për sigurinë dhe është rreptësisht e ndaluar.
