Agron Shehaj kërkon të relativizojë veprimin e tij pas përjashtimit me 60 ditë nga Kuvendi, për marrjen e dokumentit sekret të marrëveshjes së kredisë me SHBA dhe largimit me të nga ambientet e Parlamentit.
Në një intervistë për News24, deputeti dhe kreu i Partisë Mundësia u përpoq ta paraqiste situatën jo si një shkelje të rregullave parlamentare, por si një përballje për të drejtat e deputetëve. Shehaj deklaroi se dokumenti nuk ka dalë jashtë Kuvendit dhe këmbënguli se nuk ka kryer asnjë krim.
Sipas tij, marrja e dokumentit ishte një e drejtë e tij si deputet, duke e zhvendosur debatin nga përgjegjësia për veprimin e kryer tek pretendimet për kufizimin e opozitës në Parlament.
“Ne jemi në luftë të përditshme, në luftë me të drejtën e fjalës, në luftë edhe për të hyrë në Kuvend. Të marrësh apo edhe të rrëmbesh një të drejtë është krim? Nëse po, unë kam kryer një krim dhe do ta bëj”, u shpreh Shehaj.
Veprimet e mazhorancës, kur ajo ka përdorur forcën e numrave për të miratuar nisma ligjore edhe përballë kundërshtimeve të opozitës, janë tashmë një realitet i njohur i jetës parlamentare. Megjithatë, kjo nuk e justifikon veprimin e Agron Shehajt për marrjen e një dokumenti sekret dhe largimin me të nga ambientet e Kuvendit.
Kundërshtimi politik dhe beteja parlamentare zhvillohen përmes debatit, procedurave dhe mjeteve institucionale, jo përmes veprimeve që krijojnë skena të papërshtatshme dhe dëmtojnë seriozitetin e institucionit të Parlamentit.
Dhe relativizimi i këtij veprimi nga Shehaj, duke e paraqitur si një akt në mbrojtje të të drejtave të opozitës, nuk e zhbën përgjegjësinë për shkeljen e rregullave të Kuvendit. Kritika ndaj mazhorancës është legjitime, por ajo nuk mund të përdoret si justifikim për veprime që cenojnë institucionin parlamentar.
