Kuvendi i Shqipërisë miratoi me 74 votat e mazhorancës socialiste marrëveshjen e huasë prej 302 milionë dollarësh me Shtetet e Bashkuara të Amerikës, e cila do të përdoret për blerjen e pajisjeve ushtarake sipas standardeve të NATO-s.
Diskutimet për këtë marrëveshje u zhvilluan me dyer të mbyllura, pasi mazhoranca argumentoi se dokumenti përmban elementë të klasifikuar që lidhen me sigurinë kombëtare. Ndërkohë, Partia Demokratike vendosi të bojkotojë seancën, pavarësisht se deklaroi mbështetjen e saj për marrëveshjen. Sipas demokratëve, kundërshtimi lidhet me mënyrën e procedimit, duke e cilësuar futjen e saj me procedurë të përshpejtuar si antikushtetuese.
Marrëveshja parashikon financimin e pajisjeve ushtarake që synojnë rritjen e kapaciteteve mbrojtëse të Forcave të Armatosura dhe afrimin e tyre me kërkesat teknike të Aleancës së Atlantikut të Veriut. Fondet do të disbursohen në varësi të nevojave të përcaktuara nga Ministria e Mbrojtjes.
Sipas kushteve të marrëveshjes, Shqipëria do të ketë një afat prej 48 muajsh për aktivizimin e fondeve, ndërsa shlyerja e huasë do të kryhet brenda një periudhe deri në 12 vjet.
