Edi Paloka, ka komentuar zhvillimet politike në SHBA dhe ndikimin e tyre në çështjen e “non grata”-s së shpallur ndaj ish-kryeministrit Sali Berisha. Paloka është shprehur se fitorja e Donald Trump ka ndryshuar totalisht situatën, duke theksuar se kjo çështje është tashmë drejt zgjidhjes.
“Fitorja e Presidentit Trump e ka ndryshuar totalisht situatën edhe për sa i përket kësaj çështjeje. Kur Sekretari aktual i Shtetit, Marco Rubio, ishte senator, ai e ngriti pikërisht çështjen e ‘non grata’-s në senatin amerikan, duke akuzuar hapur administratën e atëhershme për përdorim politik të saj kundër liderëve të qendrës së djathtë në botë. Në këto kushte, besoj është e qartë se ‘non grata’ e Berishës praktikisht është fshirë dhe është vetëm çështje kohe derisa kjo të bëhet zyrtare,” deklaroi Paloka.
Sipas tij, ndryshe nga të tjerët që zgjedhin rrugën e lobimit, Berisha ka zgjedhur të ndjekë rrugën e drejtësisë për të zbardhur të vërtetën. “Kjo është një fitore jo vetëm për Berishën, por edhe për drejtësinë dhe politikën e djathtë në tërësi,” shtoi ai.
Paloka theksoi gjithashtu se demokratët amerikanë kanë lobuar më parë për këtë çështje, por administrata e re e Trump pritet të rishikojë vendimet e mëparshme.
