Safet Bajri, i konsideruar si i forti i Dobracit që ndodhet nën arrest pasi dyshohet se bashkë me krahun e tij të armatosur Asmer Bilali dhe kushëririn e tij Behar Bajri, ekzekutuan Fatbardh Licin në 2018 në Shkodër, është një emër që alarmoi një dekadë më parë autoritetet në Belgjikë, pasi drejtonte një nga bandat me të dhunshme të shfrytëzimit të vajzave për prostitucion.
Referuar dokumentave, rezulton se ai bashkë me vëllanë, drejtonin bandën në përbërje të cë cilës ishin dhe 10 anëtarë dhe përmes dhunës e shantazhit, shfrytëzonin vajzat në rrugët e Belgjikës, e prej këtij aktiviteti përfitonin miliona euro.
Në një vendim të Gjykatës së Apelit të Brukselit hidhet dritë mbi mënyrën sesi funksiononte banda e drejtuar nga Safet Bajri Rustemi dhe sa e dhunshme ishte kjo bandë, cka shqetësoi seriozisht autoritetet ligjzbatuese belge të cilat e renditën emrin e Bajrit si ndër më të kërkuarit në vend.
Ndërsa mediat në Belgjikë e kishin kryefjalën e tyre, në Shqipëri Safet Bajri u shfaq në një intervistë televizive duke dhënë alibinë e tij. Megjithatë ai u arrestua dhe vuajti dënimin belg.
Në dosjen belge ku zbardhen detaje të shfrytëzimit të vajzave në rrugët e Brukselit, një prej episodeve më shqetësuese është se nga komunikimet telefonike, rezultoi se vëllezërit Bajri ushtronin dhunë ndaj tyre.
Në një nga bisedat e zbardhura në dosje, një prej vajzave ankohet se nuk ka ardhur në festën e ditëlindjes së Safet Bajri Rustemit sepse e dinte që Saed Selhani (vëllai i Safet Bajrit) do të pinte dhe do ta godiste siç e ka zakon.
Kjo bisedë sipas dosjes i përket datës 14 shtator 2014. Vajza që ankohet prezantohej si mikesha e ngushtë e Sead Selhanit.
Safet Bajri Rustemi u pikas nga policia belge dhe zbulua se ishte kreu i grupit. Vajzat që shfrytëzoheshin në rrugë e zbuluan atë. Njëra nga vajzat u pyet atë kohë nga hetuesit nëse nëse kishte shkuar për tu mjekuar në spital, ajo u përgjigj: “U rrëzova nga shkallët pasi më ngeci taka dhe rashë, kjo është e gjitha”.
Por hetimet e mëtejme zbuluan se ishte Safet Bajri ai që e kishte dhunuar në mënyrë barbare duke i thyer edhe legenin.
Njëra nga vajzat e identifikuar në dosje si Kristina është dëgjuar në përgjime ti thotë Alesias, se Safeti kishte pirë dhe i thyer legenin Anxhelës.
Gjatë pyetjes në atë kohë në polici, Safet Bajri ka deklaruar se Anxhela është një vajzë që e takonte herë pas herë për tu zbavitur, që nuk e dinte ku punonte dhe se nuk e kishte goditur kurrë.
Por sipas hetuesve ai është i pabesueshëm, pasi nga përgjimet telefonike, rezulton se jo vetëm që Safet Bajri dhe Anxhela kanë patur kontakt të vazhdueshëm dhe kur ajo e uron për ditëlindje me datë 9 shtator, e pyet më pas se te cilit klient duhet të shkojë, pasi kishte patur dy telefonata.
Vajza më pas shpreh shqetësim te shoqet e saj se Safeti mund edhe ta vriste pasi ajo kishte thënë “dicka që nuk duhej”.
Safet Bajri Rustemi, i cili rezultoi se bënte një jetë luksi në Belgjikë iu tha hetuesve se të ardhurat e kanë burimin nga aktiviteti i rritjes së peshkut nga ana e familjes së tij në Shkodër. Por hetuesit thonë se të ardhurat e Bajrit rrjedhin nga aktivitete të paligjshme kriminale.
Sot Safet Bajri është kryefjala e medias, për shkak të arrestimit për ekzekutimin e Fatbardh Licit, xhaxhait të kundërshtarit të tij të përbetuar Ibrahim Lici.
Dy fiset janë në konflikt të fortë prej vitesh dhe nga “lufta” mes tyre janë vrarë shumë persona.
Safet Bajri u arrestua me urdhër të SPAK, por gjasat janë që po me urdhër të kësaj prokurorie mbi supet e tij të ngrihen edhe akuza të tjera të rënda.
