Debate të forta u zhvilluan në procesin gjyqësor ndaj të pandehurve të dosjes “5D”. Avokati i Redi Mollës, një prej të pandehurve, depozitoi në gjykatë një kërkesë për gjykim të shkurtuar. Në vijim, avokati Denion Bogdani kërkoi që të mos niste shqyrtimi gjyqësor pa u shprehur më parë gjykata mbi këtë kërkesë. Të njëjtin qëndrim mbajtën edhe avokatët Ermir Beta dhe Ardian Leka, të cilët kërkuan shtyrjen e seancës.
Nga ana tjetër, Evi Sheri, avokate e Taulant Tushës, kërkoi vijimin e seancës, çka shkaktoi përplasje mes palëve. Prokurori i Posaçëm, Klodian Braho, deklaroi se kërkesa e avokatëve nuk mund të pengojë zhvillimin e gjykimit. Në përfundim, gjykata u tërhoq për të marrë një vendim të ndërmjetëm.
Redi Molla dhe Mariglen Qato, ish-zyrtarë të Bashkisë së Tiranës, akuzohen për korrupsion dhe pastrim parash. Sipas SPAK, ata kanë krijuar kompaninë “5D”, të cilën e kontrollonin në mënyrë fiktive dhe përmes saj përfitonin tendera nga Bashkia. Edhe Taulant Tusha, gjithashtu ish-zyrtar i lartë në Bashkinë e Tiranës, akuzohet për të njëjtat vepra penale.
