Shtëpia e Bardhë ka konfirmuar se Presidenti i SHBA Donald Trump është duke zhvilluar në këto momente një takim me Këshillin e tij të Sigurisë Kombëtare. Para pak çastesh, jashtë Krahut Perëndimor të Shtëpisë së Bardhë janë parë forcat e sigurisë që tregojnë se Presidenti është brenda. Ka shumë pak gjasa të mësohet menjehërë se për çfarë po diskutohet, shkruan BBC, por fokusi është lufta mes Iranit dhe Izraelit.
CNN shkruan se presidenti po shqyrton nëse SHBA-të duhet të përfshihen më tej në konflikt. Trump u largua nga samiti i G7 në Kanada një ditë më herët për t’u kthyer në Uashington. Sipas të njëjtave burime, Izraeli u ka kërkuar Shteteve të Bashkuara një “qëndrim thjesht mbrojtës” mes konfliktit të tij me Iranin.
Më shumë se 30 cisterna ajrore amerikane për furnizim me karburant janë dërguar në rajon gjatë disa ditëve të fundit për të qenë gati nëse Trump vendos të urdhërojë Forcat Ajrore të SHBA-së të ndihmojnë në furnizimin me karburant të avionëve luftarakë izraelitë teksa ata kryejnë sulme mbi Iranin.
Zëdhënësja e Departamentit të Shtetit Tammy Bruce tha pak më herët se Presidenti Trump ka qenë i qartë se Irani nuk mund të ketë një armë bërthamore.
Bruce shtoi se Departamenti i Shtetit ka krijuar një grup pune për Lindjen e Mesme për të ndihmuar në koordinimin e mbështetjes për qytetarët dhe misionet diplomatike. Ajo u kujton qytetarëve amerikanë të mos udhëtojnë në Izrael, Irak ose Iran. Më herët Trump u shpreh se SHBA ka kontrollin e hapësirës ajrore të Iranit dhe se e dinë ku fshihet Lideri Suprem të cilin nuk do ta vrasin për momentin.
