Në një tjetër episod tronditës në Rripin e Gazës, mbi 40 palestinezë kanë humbur jetën dhe më shumë se 200 të tjerë janë plagosur këtë të hënë si pasojë e të shtënave të ushtrisë izraelite pranë qendrave të shpërndarjes së ndihmave humanitare në jug të enklavës.
Ngjarja dramatike ndodhi pranë qytetit të Rafah, ku sipas Ministrisë së Shëndetësisë në Gaza, shumica e viktimave u qëlluan teksa qëndronin në radhë për të marrë ndihma ushqimore. Skena të tmerrshme u raportuan nga dëshmitarë në vendngjarje, të cilët thanë se trupat izraelite hapën zjarr mbi civilë të paarmatosur, përfshirë gra dhe fëmijë, që po përpiqeshin të siguronin ndihmat minimale për mbijetesë.
Ky është incidenti më i rëndë që nga fillimi i operacioneve të shpërndarjes së ndihmave nga Gaza Humanitarian Foundation (GHF), një organizatë e mbështetur si nga Shtetet e Bashkuara ashtu edhe nga vetë Izraeli. Megjithatë, për ironi të fatit, pikërisht në këto pika të shpërndarjes, të cilat pretendojnë të ofrojnë siguri dhe ndihmë, kanë ndodhur disa prej akteve më tragjike ndaj popullsisë civile.
Ministria e Shëndetësisë në Gaza deklaron se kjo është një “masakër ndaj civilëve të uritur”, ndërsa shifrat totale që nga 27 maji, kur nisi programi i shpërndarjes nga GHF, janë alarmante: mbi 300 palestinezë të vrarë dhe më shumë se 2,600 të plagosur në tentativë për të marrë ndihma humanitare.
Ushtria izraelite (IDF) ka pranuar incidentin, por e ka justifikuar me pretendimin se ushtarët e saj hapën zjarr paralajmërues ndaj individëve që “paraonin një kërcënim të mundshëm për sigurinë”. Ky qëndrim ka ngjallur indinjatë të gjerë në rrafshin ndërkombëtar, pasi dëshmitarët dhe organizatat humanitare në terren e kanë hedhur poshtë këtë version, duke e konsideruar një përdorim të tepruar dhe të pajustifikueshëm të forcës ndaj civilëve.
Në një reagim të menjëhershëm, Komisioneri i Lartë i Kombeve të Bashkuara për të Drejtat e Njeriut, Volker Turk, e ka cilësuar incidentin si një “vuajtje të tmerrshme dhe të pajustifikueshme”, duke akuzuar Izraelin për përdorimin e ndihmës humanitare si një “armë lufte”. Ai ka kërkuar një hetim të plotë, të pavarur dhe transparent, si dhe mbajtjen përgjegjëse të autorëve.
Ndërkohë, Komiteti Ndërkombëtar i Kryqit të Kuq (ICRC), së bashku me një sërë organizatash të tjera ndërkombëtare, kanë shprehur shqetësim serioz për sigurinë e civilëve në Gaza dhe kanë kërkuar që operacionet e shpërndarjes së ndihmave të zhvendosen nën kontrollin e agjencive të njohura ndërkombëtare si UNRWA, për të garantuar akses të sigurt dhe të drejtë në ndihma për të gjithë popullatën e rrezikuar.
Incidenti ka shkaktuar protesta të mëdha në të gjithë territoret palestineze, si dhe në kryeqytete të ndryshme të botës, ku qytetarët dhe aktivistët për të drejtat e njeriut kanë dalë në rrugë për të dënuar ashpër atë që ata e quajnë “krim lufte” dhe “dështim moral të komunitetit ndërkombëtar”.
Ndërsa situata në Gaza përkeqësohet dita-ditës, me mungesë të theksuar të ushqimeve, ilaçeve dhe furnizimeve bazë, ky sulm ndaj civilëve që kërkojnë ndihmë, përbën një sinjal alarmi të ri për katastrofën humanitare që po luhet para syve të botës.
