Presidenti i Shteteve të Bashkuara, Donald Trump, ka reaguar pas atentatit tronditës të ndodhur në shtetin e Minnesotës, ku humbi jetën përfaqësuesja demokrate Melissa Hortman së bashku me bashkëshortin e saj, Mark Hortman. Në të njëjtin sulm u plagos rëndë edhe senatori i shtetit, John Hoffman, si dhe bashkëshortja e tij.
Në një deklaratë të publikuar nga Sekretarja për Shtyp e Shtëpisë së Bardhë, Karoline Leavitt, në rrjetin social X, presidenti Trump e ka cilësuar ngjarjen si një “sulm të qëllimshëm kundër ligjvënësve të shtetit”, duke theksuar se dhuna e tillë nuk do të tolerohet në asnjë rrethanë në territorin amerikan.
“Jam informuar mbi të shtënat e tmerrshme që ndodhën në Minnesota, të cilat duket se kanë qenë një sulm i synuar ndaj ligjvënësve të shtetit. Prokurorja jonë e Përgjithshme, Pam Bondi, dhe FBI janë duke hetuar ngjarjen dhe do të ndjekin penalisht çdo person të përfshirë deri në masën më të plotë që lejon ligji. Dhuna e tillë e tmerrshme nuk do të tolerohet në Shtetet e Bashkuara të Amerikës. Zoti i bekoftë njerëzit e mrekullueshëm të Minnesotës – një vend vërtet i jashtëzakonshëm!”, thuhet në deklaratën e presidentit.
Si ndodhi atentati?
Sipas informacioneve të publikuara nga autoritetet lokale, autori i dyshuar ishte maskuar si oficer policie, duke veshur një uniformë dhe mbajtur një stemë të ngjashme me atë zyrtare. Ai gjithashtu drejtonte një automjet që i ngjante një makine patrulle, gjë që i mundësoi të hynte në pronën e Hortman-ëve pa ngjallur dyshime.
Superintendenti i Minnesotës, Drew Evans, konfirmoi se rreth orës 02:00 të mëngjesit, shërbimet emergjente morën një telefonatë urgjente për një incident që përfshinte senatorin John Hoffman dhe gruan e tij.
Më pas, rreth orës 03:35, gjatë një kontrolli proaktiv në banesën e Melissa Hortman, forcat e rendit hasën në të dyshuarin, i cili hapi zjarr ndaj tyre. Pas shkëmbimit të zjarrit, autori arriti të arratisej, ndërsa në vendngjarje u gjetën armë zjarri dhe prova që lidhen me sulmin.
Gjendja e të plagosurve dhe hetimet
Senatori John Hoffman ndodhet në gjendje kritike, por stabël në një spital të Minneapolis-it, ndërsa bashkëshortja e tij është jashtë rrezikut për jetën.
Ndërkohë, hetimet janë marrë nën kontroll nga FBI dhe Prokuroria e Përgjithshme, ndërsa operacioni për kapjen e autorit vijon me përforcime të shumta në të gjithë territorin e shtetit të Minnesotës.
Policia ka apeluar qytetarët të raportojnë çdo informacion që mund të ndihmojë në kapjen e autorit të këtij krimi makabër, që ka tronditur politikën amerikane dhe ka hapur një debat të ashpër për sigurinë e ligjvënësve dhe figurave publike.
