Pas nisjes së një vale të re sulmesh të gjera ajrore ndaj Iranit, autoritetet izraelite kanë ndërmarrë masa të jashtëzakonshme sigurie, duke mbyllur përkohësisht të gjitha ambasadat dhe përfaqësitë diplomatike të Izraelit në mbarë botën. Po ashtu, është pezulluar ofrimi i të gjitha shërbimeve konsullore, përfshirë ndihmën ndaj qytetarëve në nevojë nëpër vendet ku ndodhen.
Vendimi është marrë në kuadër të rrezikut të shtuar ndaj personelit diplomatik dhe shtetasve izraelitë jashtë vendit, pas përshkallëzimit dramatik të tensioneve me Iranin. Ministria e Jashtme e Izraelit i ka bërë thirrje të gjithë qytetarëve izraelitë që ndodhen jashtë territorit kombëtar, të tregojnë kujdes maksimal, të shmangin çdo shfaqje të simboleve izraelite apo hebraike në ambiente publike, dhe të jenë në kontakt të vazhdueshëm me autoritetet lokale të sigurisë, sidomos në rastet kur ndodhen në situata të dyshimta apo potencialisht të rrezikshme.
Për më tepër, Ministria ka kërkuar nga të gjithë izraelitët që ndodhen jashtë vendit të plotësojnë një formular zyrtar, ku raportojnë vendndodhjen dhe gjendjen e tyre aktuale. Kjo është një masë që është përdorur edhe në situata të mëparshme krize, siç ishte rasti pas sulmit të Hamasit më 7 tetor 2023, për të lehtësuar koordinimin në kthimin e rezervistëve apo organizimin e fluturimeve të posaçme për evakuim në rast nevoje.
Autoritetet izraelite nuk kanë dhënë ende informacion se për sa kohë do të zgjasë mbyllja e përfaqësive diplomatike, por theksojnë se vendimi është i përkohshëm dhe varet nga evoluimi i situatës së sigurisë.
Kjo masë ekstreme shënon një nivel të lartë të alarmit diplomatik dhe ushtarak dhe vjen në një moment kur bota ndodhet në një klimë të pasigurisë së rritur, mes konflikteve të hapura në Lindjen e Mesme dhe përshkallëzimeve të vazhdueshme mes Izraelit dhe Iranit, dy vende me potencial për të zgjeruar konfliktin në rajon dhe përtej.
