Më 6 janar, besimtarët ortodoksë në mbarë botën kremtojnë Ditën e Ujit të Bekuar, një prej festave më të rëndësishme të kalendarit kishtar.
Kjo ditë lidhet me pagëzimin e Jezu Krishtit nga Gjon Pagëzori në ujërat e lumit Jordan. Sipas traditës, në këtë akt të shenjtë, ujërat e botës u bekohen, duke u kthyer në simbol të pastrimit shpirtëror dhe ripërtëritjes.
Historia e kësaj dite na tregon se Gjon Pagëzori fillimisht dëshironte të pagëzohej nga vetë Krishti, por Jezu Krishti, me përulësi, zgjodhi të pagëzohej nga Gjoni, duke e miratuar këtë akt si një proces të rëndësishëm shpirtëror për njerëzimin.
Në liturgjinë e 6 janarit, besimtarët mblidhen për të marrë pjesë në ceremoninë e shenjtë, ku prifti bekon ujërat, një traditë që simbolizon pastrimin dhe mbrojtjen hyjnore për çdo njeri. Në disa vende, kjo ceremoni zhvillohet pranë lumenjve apo detit, ku klerikët hedhin kryqin në ujë dhe besimtarët zhytën për ta nxjerrë.
Dita e Ujit të Bekuar shënon gjithashtu përfundimin e festimeve të Krishtlindjes, duke u bërë thirrje besimtarëve për të reflektuar mbi vlerat e përulësisë, pastrimit shpirtëror dhe lidhjes me Zotin.
