Përdorimi i automjeteve në Shqipëri do të ndeshet me kufizime gjatë vitit 2025, sipas planit të ri Kombëtar për Energjinë dhe Klimën, që Ministria e Infrastrukturës dhe Energjisë ka hedhur për konsultim publik. Ky plan ka për qëllim të reduktojë përdorimin e burimeve të energjisë dhe të afrohet më shumë me politikat e Bashkimit Europian.
Në kuadër të këtij plani, parashikohet që gjatë vitit 2025 të ketë kufizime në përdorimin e automjeteve, të cilat do të mund të përdoren vetëm në ditë të caktuara të javës, duke u bazuar në targat e makinave. Kjo masë është zbatuar në shumë shtete të Europës, Amerikës, Azisë dhe Afrikës, me qëllimin e uljes së ndotjes së ajrit dhe përmirësimit të trafikut.
Gjithashtu, plani parashikon rritjen e përdorimit të automjeteve elektrike në vitet në vijim. Sipas projektit, deri në vitin 2030, 10% e flotës së automjeteve në Shqipëri do të jetë elektrike. Për të mbështetur këtë, qeveria ka vendosur të instalojë stacione karikimi për automjetet elektrike në pikat ekzistuese përgjatë rrugëve kombëtare, në pikat kufitare dhe zonat turistike, si dhe të kërkojë nga operatorët ekonomikë të pajisin parkimet dhe garazhet publike me stacione karikimi.
