Kryetari i Partisë Demokratike, Sali Berisha, mbajti sot një fjalim para SPAK gjatë protestës së opozitës. Duke u ndalur te diferencat mes protestës së opozitës dhe asaj të mbështetësve të kryebashkiakut Erion Veliaj disa ditë më parë, Berisha e cilësoi tubimin e qeverisë si një përpjekje për grusht shteti.
Berisha: Veliaj dhe Rama, si Eskobari
Në fjalën e tij, Berisha e quajti protestën e mbështetur nga qeveria një akt puçist dhe banditesk:
“Dënoj me forcën më të madhe aktin puçist të narkoqeverisë dhe narkobashkisë Rama, të cilët morën peng për orë të tëra gjykatës dhe prokurorë. Rikthyen në Tiranë skenat e viteve ’80, kur Eskobari sulmoi gjykatën. Sot kemi rastin ‘Ediskobar’ që kreu të njëjtin akt ndaj gjykatës dhe prokurorisë,” – tha Berisha.
Ai theksoi se protestat e grupeve opozitare para institucioneve janë të zakonshme në demokraci, por protestat e organizuara nga qeveria përbëjnë një rrezik për shtetin e së drejtës:
“Në historinë e botës ka me qindra raste protestash opozitare. Por një protestë shtetërore ndaj institucioneve të drejtësisë është grusht shteti brenda shtetit,” – u shpreh lideri demokrat.
