Kryetari i Partisë Demokratike Sali Berisha, duke iu përgjigjur interesit të panelistëve në prezantimin e programit ekonomik të PD, u shpreh se, Shqipëria është një vend me mundësi shumë të mëdha. Berisha u shpreh se, vendi do të drejtohet drejt dixhitalizimit të thellë, bitcoin, blachain, që duhet të jenë risitë e zhvillimit të Shqipërisë.
Në fjalën e tij, kryedemokrati u shpreh se, me të ardhur në pushtet qeverisja e PD, do të bëjë një auditim të plotë të 12 viteve të qeverisjes së Edi Ramës për të zbuluar se ku kanë shkuar 64 miliardë euro nga buxhetet e qeverisë.
Në fakt, auditi që do bëjë Berisha kur të vij në pushtet, është i njëjtë me atë që premtonte Edi Rama në vitin 2013. Asokohe, kreu i PS premtonte se rilindja ekonomike do të niste nga një analizë e thellë për të ditur me saktësi si ishte menaxhuar buxheti i shqiptarëve.
“Rruga e rilindjes ekonomike të Shqipërisë nis nga nxjerrja në dritën e të vërtetës së gjendjes aktuale të financave shqiptare. Na duhet të dimë me saktësi një orë e më parë, sa e madhe është gropa e krijuar në buxhetin e shqiptarëve në këto vite politikash rrënuese, ekonomike e fiskale. E për këtë na duhet një analizë e thellë, objektive dhe e pavarur” – shprehej Rama në kohën kur ishte në opozitë.
