Deputeti demokrat Dashnor Sula, gjatë një interviste në A2 CNN, kritikoi ashpër qeverinë për korrupsion, arrogancë dhe shpërfillje të ligjit. Sula theksoi se situata ka arritur në një pikë ku vendimet e Gjykatës Kushtetuese nuk respektohen, duke i bërë thirrje Kryetarit të Gjykatës Kushtetuese, ose gjithë trupës gjyqësore, të japin dorëheqjen.
“Nuk mund të shkelet Gjykata Kushtetuese. Kryetari i saj duhet të japë dorëheqjen. Nuk ka shtet ligjor nëse nuk zbatohen vendimet e Gjykatës Kushtetuese,” tha Sula.
Gjithashtu, ai bëri thirrje për një radikalizim të aksionit opozitar, duke paralajmëruar grevë urie si formë proteste. “Është momenti për radikalizim. Grevë urie dhe sakrificë sublime. Ka burra në parlament. Unë jam i pari që hyj në grevë,” u shpreh deputeti demokrat.
Ai nënvizoi se nuk duhet të ketë më marrëveshje me mazhorancën, dhe opozita duhet të ndërmarrë veprime më të ashpra për të mbrojtur demokracinë.
