Ish-ministri gjerman për Europën, Michael Roth, ka reaguar ashpër ndaj deklaratës së Ivica Daçiçit se flamuri serb një ditë do të valëvitet në Prizren, duke e cilësuar atë si një pretendim territorial ndaj Kosovës.
Në një postim në rrjetet sociale, Roth kritikoi qëndrimin e ministrit të Brendshëm dhe zëvendëskryeministrit të Serbisë, duke paralajmëruar se deklarata të tilla e largojnë vendin nga rruga e integrimit europian.
“Serbia e gjorë! Ivica Daçiç dëshiron që flamuri serb të valëvitet mbi Prizren. Pretendimet territoriale ndaj një fqinji më lënë pa fjalë”, shkroi Roth.
Ai vijoi me një mesazh të drejtpërdrejtë për Beogradin: “Kjo rrugë çon drejt luftës. Nuk çon drejt Bashkimit Europian. Nuk ka më para të BE-së për Serbinë!”
Roth iu drejtua edhe votuesve serbë, duke u bërë thirrje të reflektojnë për drejtimin politik që mbështesin, në prag të zgjedhjeve të përmendura prej tij për 25 tetorin.
Deklarata e Daçiçit ishte kritikuar më herët edhe nga ministri i Punëve të Jashtme dhe Diasporës i Kosovës, Glauk Konjufca. Ky i fundit reagoi gjithashtu ndaj paraqitjes publike të Milan Radoiçiçit në tubimin e presidentit serb, Aleksandar Vuçiç, në Kragujevc.
Në platformën X, Konjufca u shpreh se këto zhvillime dëshmojnë vazhdimësinë e synimeve territoriale të Serbisë ndaj Kosovës dhe mungesën e llogaridhënies për sulmin e armatosur në Banjskë, në shtator të vitit 2023. Ai e cilësoi Radoiçiçin si organizator të këtij sulmi.
