Të hënën, zëvendëspresidenti amerikan JD Vance zhvilloi një bisedë të tensionuar telefonike me kryeministrin izraelit Benjamin Netanyahu, sipas raportimeve të Axios. Në këtë bisedë, Vance kritikoi ashpër Netanyahu-n, duke e akuzuar se i kishte paraqitur presidentit Donald Trump idenë e një lufte “të lehtë” kundër Iranit.
Burimet thonë se Vance ka vënë në dyshim prezantimin e Netanyahu-t mbi ndryshimin e regjimit iranian, duke e bërë atë të duket më i realizueshëm se sa ishte në të vërtetë. Një zyrtar amerikan e përshkroi situatën duke përdorur nofkën “Bibi” për Netanyahun dhe tha se Vance kishte një pamje më të saktë mbi disa nga këto pretendime.
Pas telefonatës, disa burime amerikane deklaruan se Izraeli po përpiqej të minonte rolin e Vance, i cili ka një rol kyç në negociatat për arritjen e një armëpushimi me Iranin. Vance, i njohur për qëndrimet e tij kundër përfshirjes në luftëra të zgjatura, punon së bashku me negociatorët Steve Witkoff dhe Jared Kushner për të arritur një marrëveshje.
Një zyrtar amerikan tha se raportimet se Irani do të negociojë drejtpërdrejt me Vance mund të jenë një strategji e Izraelit, pasi ata e shohin atë si më fleksibël për të siguruar një marrëveshje. Megjithatë, mediumi thekson se nuk ka prova konkrete që mbështesin këtë pretendim.
Sipas një tjetër burimi amerikan, Vance shihet si figura kryesore që mund të arrijë një marrëveshje me Iranin. “Nëse iranianët nuk negociojnë me Vance, nuk do të arrijnë marrëveshje me askënd tjetër,” tha zyrtari, duke e cilësuar atë si opsionin më të mirë të mundshëm.
