Senatorja republikane nga Alaska, Lisa Murkowski, po përgatit një projekt-ligj që do ta detyronte Kongresin amerikan të votojë për herë të parë nëse duhet të autorizohet zyrtarisht lufta kundër Iranit.
Nisma synon të vendosë kufij dhe qartësi për operacionet ushtarake, pasi administrata e presidentit Donald Trump është kritikuar se ka mbajtur Kongresin jashtë vendimmarrjes dhe nuk ka dhënë detaje për objektivat, koston dhe kohëzgjatjen e konfliktit.
Murkowski po punon me një grup senatorësh për një autorizim formal të përdorimit të forcës ushtarake kundër Iranit, por rezoluta ende nuk është paraqitur zyrtarisht. Nëse depozitohet, ajo do të duhet të votohet shpejt në të dyja dhomat e Kongresit dhe pritet të shkaktojë debat të fortë politik, sidomos në prag të zgjedhjeve të ndërmjetme.
Lufta, që nisi më 28 shkurt me sulme të SHBA dhe Izraelit ndaj Iranit, ka ngritur shqetësime në rritje mes disa republikanëve në Kongres për mungesën e informacionit mbi mundësinë e dërgimit të trupave tokësore dhe kostot e përgjithshme të operacionit.
Sipas ligjit amerikan për kompetencat e luftës të vitit 1973, Kongresi duhet të shqyrtojë dhe të votojë për autorizime të tilla brenda pak ditësh nga paraqitja e tyre. Megjithatë, meqë Kongresi pritet të hyjë në pushim dyjavor, çdo votim i mundshëm ka gjasa të ndodhë pas rikthimit të ligjvënësve.
Deri tani republikanët në përgjithësi kanë bllokuar përpjekjet e demokratëve për të kufizuar autoritetin e presidentit në këtë konflikt. Por një votim për autorizimin e luftës do t’i detyronte ligjvënësit të shprehen qartë nëse e mbështesin apo jo vazhdimin e operacionit ushtarak.
