Një deputete në Finlandë është shpallur fajtore nga gjykata supreme e vendit për nxitje të urrejtjes, pasi deklaroi se homoseksualiteti është një “çrregullim zhvillimi”.
Päivi Räsänen, deputete e partisë Kristian Demokrate, kishte bërë këtë deklaratë në një broshurë të botuar fillimisht në vitin 2004 dhe të ripublikuar në vitin 2007 në faqet e Fondacionit Luther në Finlandë dhe të Dioqezës Misionare Ungjillore Finlandeze.
Me një votim 3-2, gjykata supreme vendosi të enjten se Räsänen ka kryer vepër penale kur e ripublikoi broshurën në Facebook në vitin 2019 dhe më pas në faqen e saj në internet një vit më vonë. Ajo u dënua me një gjobë prej 1,800 eurosh. Gjykata argumentoi se pretendimi i saj se homoseksualiteti është një çrregullim i zhvillimit psikoseksual është i pasaktë.
Në procesin gjyqësor, Räsänen u mbështet nga organizata konservatore amerikane Alliance Defending Freedom, e cila e ka përdorur këtë çështje si shembull të asaj që e konsideron censurë në Evropë.
Pas vendimit, Räsänen e quajti rezultatin “tronditës” dhe tha se po shqyrton mundësinë e apelimit në European Court of Human Rights. Gjykatat më të ulëta më parë e kishin shpallur të pafajshme.
Vendimi shkaktoi reagime të forta në Finlandë. Politikanë nga partia e saj dhe nga Finns Party kërkuan ndryshime në ligj, duke argumentuar se liria e shprehjes është cenuar dhe se legjislacioni aktual nuk është mjaftueshëm i qartë për qytetarët.
Kryeministri i Finlandës, Petteri Orpo, refuzoi të komentojë vendimin, duke theksuar se politikanët nuk duhet të ndërhyjnë në vendimet e gjykatave.
