Arabia Saudite ka kryer një seri sulmesh të padeklaruara ndaj Iranit në fund të muajit mars, në përgjigje të sulmeve me raketa dhe dronë që Teherani kishte ndërmarrë ndaj territorit saudit gjatë luftës në Lindjen e Mesme. Lajmi është bërë publik nga Reuters, duke cituar dy zyrtarë perëndimorë dhe dy zyrtarë iranianë të informuar mbi zhvillimet.
Sipas raportimit, bëhet fjalë për herën e parë që Riadi dihet se ka ndërmarrë drejtpërdrejt veprime ushtarake në territorin iranian, një zhvillim që tregon ndryshimin e qasjes saudite ndaj rivalit të saj më të madh rajonal.
Reuters shkruan se sulmet janë kryer nga Forcat Ajrore Saudite si kundërpërgjigje ndaj goditjeve që Arabia Saudite kishte marrë gjatë konfliktit rajonal që shpërtheu pas sulmeve amerikano-izraelite ndaj Iranit më 28 shkurt. Nuk janë bërë publike objektivat konkrete të goditura në Iran.
Sipas burimeve, pas sulmeve ka pasur kontakte intensive diplomatike mes Teheranit dhe Riadit, të shoqëruara me paralajmërime saudite për hakmarrje të mëtejshme nëse tensionet vazhdonin. Kjo ka çuar më pas në një marrëveshje informale për uljen e tensioneve mes dy vendeve.
Raporti tregon se lufta në Lindjen e Mesme ka qenë shumë më e gjerë nga sa është pranuar publikisht. Gjatë konfliktit, Irani ka goditur me raketa dhe dronë të gjashtë vendet e Këshillit të Bashkëpunimit të Gjirit, duke synuar jo vetëm baza amerikane, por edhe aeroporte, infrastrukturë energjetike dhe objekte civile.
Reuters shkruan gjithashtu se edhe Emiratet e Bashkuara Arabe kanë kryer sulme ushtarake ndaj Iranit, ndërsa monarkitë e Gjirit, të goditura nga sulmet iraniane, kanë nisur t’i përgjigjen ushtarakisht Teheranit.
Megjithatë, qasja saudite ka qenë më e kujdesshme se ajo e Emirateve. Arabia Saudite ka vijuar kontaktet diplomatike me Iranin dhe ka kërkuar të shmangë një përshkallëzim të pakontrolluar të konfliktit.
Sipas raportit, pas marrëveshjes informale për de-përshkallëzim, numri i sulmeve iraniane ndaj Arabisë Saudite ra ndjeshëm në javën para armëpushimit më të gjerë mes Iranit dhe SHBA-së të arritur më 7 prill.
