Julia Mendel, ish-zëdhënësja e Presidentit ukrainas Volodymyr Zelensky, ka bërë deklarata të forta kundër ish-shefit të saj gjatë një interviste në podcastin e gazetarit amerikan Tucker Carlson.
Mendel, e cila tha se ka punuar për Zelenskyn nga viti 2019 deri në vitin 2021 dhe se e kishte mbështetur edhe pas nisjes së pushtimit rus në vitin 2022, deklaroi se presidenti ukrainas është krejt ndryshe nga imazhi që shfaq publikisht.
“Së pari, ai nuk është personi që shihni në kamera. Është një person krejt ndryshe. Ai ndryshon maska gjatë gjithë kohës. Është emocionalisht i pakontrollueshëm”, tha ajo gjatë intervistës.
Sipas Mendel, Zelensky “shpesh është histerik”, nuk kontrollon emocionet dhe nuk ka empatinë që shfaq publikisht.
“Është një aktor jashtëzakonisht i talentuar. Në kamera luan rolin e një arushi të butë, por kur fiket drita, është një ari i egër dhe shkatërron njerëzit”, deklaroi ish-zëdhënësja.
Ajo tha gjithashtu se Perëndimi ka krijuar një “mit” rreth Zelenskyt dhe se shumë njerëz vazhdojnë të besojnë se mbështetja për presidentin ukrainas është e njëjtë me mbështetjen për Ukrainën.
Mendel u përpoq të theksojë se nuk po justifikonte pushtimin rus apo Vladimir Putinin, duke e cilësuar agresionin rus “krim kundër njerëzimit”, por shtoi se lufta “nuk është më bardh e zi”.
“Ne e shohim Putinin si të keqen, por edhe Zelensky është një e keqe. Vetëm se është një e keqe e fshehur”, tha ajo.
Në pjesën më të fortë të intervistës, ish-zëdhënësja hodhi akuza edhe për korrupsion dhe pastrim parash në administratën ukrainase.
Ajo pretendoi se Zelensky “qëndron pas shumë skemave të pastrimit të parave” dhe tregoi një episod ku, sipas saj, një kandidat për post në Ministrinë e Politikave Sociale ishte pyetur gjatë intervistës për “skema pastrimi parash” që mund të financoheshin përmes ministrisë.
Deklaratat e Mendel kanë nisur të qarkullojnë gjerësisht në rrjetet sociale dhe mediat online, duke shkaktuar debat të fortë për shkak të rolit që ajo ka pasur pranë presidentit ukrainas.
