Një grua franceze, e cila rezultoi pozitive me hantavirus pasi u evakuua nga një anije turistike në mes të një shpërthimi vdekjeprurës të virusit, kishte raportuar simptoma te mjekët në bord, por ishte informuar se bëhej fjalë vetëm për ankth ose stres.
Sipas ministrit spanjoll të Shëndetësisë, Javier Padilla Bernáldez, gruaja kishte shfaqur simptoma të ngjashme me gripin dhe kollë disa ditë më parë, por gjendja e saj dukej në përmirësim dhe nuk kishte temperaturë. Megjithatë, më vonë, Organizata Botërore e Shëndetësisë bëri të ditur se ajo ndodhet në gjendje “shumë kritike”.
Anija MV Hondius, e cila ishte në qendër të shpërthimit të hantavirusit, u largua nga porti i Tenerifes pasi mbi 120 persona nga 23 shtete u riatdhesuan brenda 48 orëve në një operacion që autoritetet spanjolle e cilësuan si “kompleks” dhe “të paprecedentë”.
Në bord mbetën 26 anëtarë ekuipazhi dhe dy punonjës shëndetësorë, ndërsa anija po shkon drejt Roterdamit për dezinfektim. Në të ndodhet edhe trupi i një pasagjeri gjerman që humbi jetën gjatë udhëtimit.
Pavarësisht tre viktimave dhe tetë rasteve të konfirmuara në anije, mjekët e Qendrës Europiane për Parandalimin dhe Kontrollin e Sëmundjeve dhe shërbimit shëndetësor spanjoll nuk i konsideruan simptomat e gruas si të lidhura me hantavirusin, duke menduar se bëhej fjalë për stres apo ankth.
Drejtori i Përgjithshëm i OBSH-së, Tedros Adhanom Ghebreyesus, falënderoi Spanjën për ndërhyrjen dhe tha se gruaja franceze ndodhet në gjendje shumë të rëndë, duke shtuar: “Imagjinoni sikur të kishte qëndruar më gjatë në anije”.
Gruaja ishte një nga pesë pasagjerët francezë që zbritën nga anija në Tenerife dhe më pas u transportuan në një spital në Paris. Ministrja franceze e Shëndetësisë, Stéphanie Rist, deklaroi se simptomat e saj u përkeqësuan gjatë natës dhe analizat rezultuan pozitive.
Ndërkohë, autoritetet shëndetësore në disa vende po monitorojnë pasagjerët dhe kontaktet e tyre, ndërsa OBSH dhe qeveria spanjolle kanë theksuar se rreziku për publikun mbetet i ulët dhe nuk ka vend për krahasime me pandeminë e Covid-19.
