Ferit Hoxha u detyrua të bëjë sqarim publik vetëm pak orë pasi deklaroi për Euroactiv se marrëveshja me Italinë për kampin e Gjadrit “është për pesë vjet” dhe se “nuk jam i sigurt që do të ketë zgjatje”.
Deklarata u interpretua menjëherë në mediat e të dy vendeve si një sinjal se Tirana nuk e konsideron të përhershme marrëveshjen për kampin e emigrantëve në Gjadër. Por më vonë gjatë ditës, ministri i Jashtëm u përpoq të korrigjonte efektin e deklaratës së tij, duke thënë se nuk kishte shpallur ndonjë vendim politik dhe se kishte bërë thjesht një reflektim hipotetik për një Shqipëri që deri atëherë mund të jetë pjesë e Bashkimit Europian.
Për disa orë, të gjithë menduan se marrëveshja kishte një afat. Por më pas, nisën sqarimet se kishte patur një ngatërresë në përkthim.
Pas zhurmës së krijuar ministrit Hoxha i erdhi në ndihmë edhe Edi Rama, i cili garantoi publikisht se qëndrimi i Shqipërisë nuk ka ndryshuar dhe se protokolli me Italinë “do të vazhdojë për aq kohë sa e dëshiron Italia”.
Në fund, deklarata e parë mbeti deklaratë, sqarimi mbeti sqarim dhe të gjithëve iu desh të kuptonin se versioni zyrtar i ditës ishte ai i fundit.
