Presidenti i SHBA-së, Donald Trump, ka deklaruar se fundi i luftës mes Rusisë dhe Ukrainës “po afrohet shumë”, duke lënë të kuptohet se një marrëveshje paqeje mund të jetë pranë.
I pyetur mbi perspektivat e përfundimit të konfliktit, Trump u shpreh se beson fort në një zgjidhje të afërt mes dy vendeve. “Fundi i luftës në Ukrainë, me të vërtetë mendoj se po afrohet shumë”, tha ai, duke shtuar se Shtetet e Bashkuara po punojnë për të ndihmuar në arritjen e një marrëveshjeje mes Moskës dhe Kievit.
“Besojeni ose jo, po afrohet dhe ne mendojmë se do të arrijmë një zgjidhje midis Rusisë dhe Ukrainës”, theksoi Trump, duke përsëritur gjithashtu pretendimin e tij se ka ndihmuar në zgjidhjen e “tetë luftërave” gjatë karrierës së tij politike.
Ai u pyet gjithashtu nëse ekziston një mirëkuptim mes tij dhe presidentit rus Vladimir Putin lidhur me një marrëveshje të mundshme paqeje që do t’i jepte Rusisë kontrollin e plotë mbi rajonin e Donbasit. Trump e mohoi shkurt këtë pretendim, duke u përgjigjur: “Jo”.
Deklaratat e tij vijnë në një moment kur diskutimet ndërkombëtare për një zgjidhje të mundshme të luftës në Ukrainë po intensifikohen, ndërsa situata në front mbetet ende e tensionuar.
