Marco Rubio, aktualisht sekretar i Shtetit i SHBA-së në administratën e Donald Trump, kishte përfunduar prej vitesh në listën e zezë të Pekinit për shkak të deklaratave të tij kundër Kinës dhe kritikave për shkeljen e të drejtave të njeriut.
Gjatë kohës që ishte senator, Rubio u sanksionua nga qeveria kineze, përfshirë edhe ndalimin e hyrjes në territorin kinez. Sanksionet erdhën pas qëndrimeve të tij për trajtimin e ujgurëve, zhvillimet në Hong Kong dhe politikat kineze ndaj lirive civile.
Megjithatë, Pekini konfirmoi këtë javë se Rubio nuk do të pengohet të hyjë në Kinë nëse udhëton së bashku me Trumpin dhe delegacionin amerikan në avionin presidencial amerikan.
“Sanksionet synojnë deklaratat dhe veprimet e Rubios gjatë mandatit të tij si senator amerikan në lidhje me Kinën”, deklaroi zëdhënësi i ambasadës kineze, Liu Pengyu.
Sipas raportimeve diplomatike, Kina duket se ka gjetur një mënyrë të pazakontë për të shmangur problemin. Pak para se Rubio të merrte detyrën si sekretar i Shtetit në janar 2025, media shtetërore kineze dhe institucionet zyrtare ndryshuan mënyrën si shkruhej emri i tij në gjuhën kineze, duke përdorur një karakter tjetër për rrokjen e parë të mbiemrit.
Dy diplomatë të cituar në raportime ndërkombëtare thanë se ndryshimi i emrit shihet si një zgjidhje teknike dhe diplomatike për të shmangur konfliktin me sanksionet ekzistuese, pasi ndalimi i hyrjes mbetet i regjistruar vetëm me versionin e vjetër të emrit të Rubios.
