Gjykata e Apelit të Posaçëm shpalli vendimin për të pandehurit për aferën e inceneratorit të Tiranës dhe riktheu në burg Lefter Kokën, ish-ministër i Mjedisit. Sipas përllogaritjeve, Kokës i kanë mbetur pa vuajtur edhe 6 muaj burgim.
Trupa gjykuese e kryesuar nga Iliriana Olldashi dhe anëtare Nertina Kosova e Daniela Shirka vendosi ndryshimin e vendimit nr. 30, datë 16.04.2025, të Gjykatës së Posaçme të Shkallës së Parë për Korrupsionin dhe Krimin e Organizuar, për të pandehurin Lefter Koka, duke hequr pikën “3” të dispozitivit të këtij vendimi, që ka disponuar “për shuarjen e masës së sigurimit ‘arrest në burg’”, caktuar ndaj të pandehurit Lefter Koka me vendimin nr. 134, datë 07.12.2023, të Gjykatës së Posaçme të Shkallës së Parë për Korrupsionin dhe Krimin e Organizuar.
Ish-ministri i Mjedisit, Lefter Koka, ishte dënuar nga GJKKO me 3 vjet burgim, dënim i cili u reduktua në 2 vjet falë gjykimit të shkurtuar, si dhe u urdhërua shuarja e masës së sigurimit “arrest me burg”.
Apeli i Posaçëm vendosi po ashtu të deklarojë fajtor për “shpërdorim detyre”, në bashkëpunim, me 8 muaj burgim, si dhe heqjen e të drejtës për të ushtruar funksione publike për 5 vjet. Më herët Llapaj ishte shpallur i pafajshëm.
Ndërkohë, për të pandehurit Erjon Murataj, Namik Simixhiu, Bledar Karoli, Taulant Tusha dhe Valbona Ballgjini u la në fuqi dënimi i GJKKO-së me 2 vjet burgim secili, ndërsa për Sidita Kopliku dënimi me 8 muaj burgim.
Ish-deputeti socialist, Alqi Bllako, është gjykuar veçmas për aferën e inceneratorit të Tiranës dhe u dënua me 2 vjet e 8 muaj burgim.
Prokuroria e Posaçme thotë se nga hetimet rezultoi se kompania koncesionare ka qenë në dijeni të rrethanave konkurruese para se të shpallej procedura dhe se u ndihmua nga zyrtarët publikë në përgatitjen e dokumentacionit dhe paraqitjen e ofertës që e shpalli atë fituese.
Kompania koncesionare Integrated Energy BV SPV u sekuestrua në gusht të vitit 2023, ndërsa SPAK deklaroi se pronarët faktikë të inceneratorit janë biznesmenët në arrati Klodian Zoto dhe Mirel Mërtiri.
