Nikolay Mladenov, përfaqësues i lartë i Këshillit të Paqes për Gazën, ka deklaruar në Jeruzalem se Hamasi duhet të çarmatoset, por nuk duhet të eliminohet si forcë politike.
Duke folur për strukturën e krijuar nga presidenti amerikan Donald Trump, diplomati bullgar theksoi se nuk kërkohet zhdukja e Hamasit si entitet politik. Megjithatë, sipas tij, është e papranueshme që grupe të armatosura apo milici me struktura ushtarake, arsenale dhe rrjete tunelesh të ekzistojnë paralelisht me një autoritet palestinez kalimtar.
“Ne nuk kërkojmë që Hamasi të zhduket si entitet politik, por grupet e armatosura nuk mund të funksionojnë paralelisht me një autoritet palestinez kalimtar”, u shpreh Mladenov.
Ai shtoi gjithashtu se procesi i rindërtimit të Rripit të Gazës do të jetë afatgjatë dhe mund të zgjasë për dekada. Sipas tij, shkatërrimet janë të mëdha, me miliona tonë mbetje, dëmtim të infrastrukturës dhe nevojë urgjente për strehim, ujë dhe kanalizime për mbi një milion banorë.
