Një rabin ekstremist i njohur për shkatërrimin e shtëpive civile në Gaza është përzgjedhur të ndezë një pishtar në ceremoninë e Ditës së Pavarësisë së Izraelit, një vendim që aktivistët e të drejtave të njeriut e cilësuan si një sinjal se shteti po legjitimon gjenocidin dhe spastrimet etnike.
Avraham Zarbiv është një nga 14 personat e përzgjedhur për “kontribut të jashtëzakonshëm ndaj shoqërisë dhe shtetit”, së bashku me një shkencëtar, një kuzhinier me yll Michelin, një mjek të njohur, pjesëtarë të forcave të sigurisë dhe sipërmarrës.
Zarbiv, një rezervist që drejton buldozerë të blinduar, u bë i njohur përmes videove në rrjetet sociale ku dokumenton shkatërrimin e ndërtesave në Gaza, shpesh të shoqëruara me retorikë të ashpër. Në një prej videove ai deklaron: “Nuk do t’ju mbetet asgjë. Do t’ju rrafshojmë dhe do t’ju shkatërrojmë”.
Pamjet u përhapën aq shumë sa emri i tij u kthye edhe në një shprehje në zhargonin hebraik: “të bësh zarbiv”, që do të thotë të shkatërrosh plotësisht.
Organizata izraelite e të drejtave të njeriut B’Tselem tha se përzgjedhja e tij për ceremoninë përbën një miratim zyrtar të dehumanizimit të palestinezëve dhe të shkatërrimit sistematik të jetës palestineze. Sipas saj, ky vendim i dërgon botës mesazhin se në Izrael “gjenocidi, spastrimi etnik dhe krimet e luftës paraqiten si ‘fryma e kombit’”.
Ministrja e kabinetit Miriam Regev tha se e zgjodhi Zarbivin për shkak të rolit të tij “frymëzues” si rabin dhe ushtar, duke e përshkruar si një figurë që qëndron “mes librit dhe shpatës”.
Ndërkohë, gazeta izraelite Haaretz shkroi në një editorial se nderimi i një personi që është bërë simbol i rrafshimit të Gazës dëmton mbrojtjen e Izraelit ndaj akuzave për gjenocid në gjykatat ndërkombëtare.
Zarbiv ka shërbyer për qindra ditë në Gaza si operator i buldozerëve të blinduar D9 dhe në janar 2025 deklaroi se kishte shkatërruar “50 shtëpi në javë”. Ai tha se shumë familje palestineze nuk kanë më as shtëpi, as dokumente dhe as fotografi familjare.
Sipas OKB-së, rreth nëntë në dhjetë shtëpi në Gaza janë shkatërruar ose dëmtuar gjatë luftës, ndërsa infrastruktura civile – përfshirë shkolla, spitale, xhami, varreza dhe dyqane – është goditur gjerësisht. Disa ekspertë kanë sugjeruar që ky nivel shkatërrimi mund të konsiderohet një krim i ri lufte, i quajtur “domicide”, që nënkupton shkatërrimin sistematik të shtëpive dhe hapësirave të jetesës.
