Spanja, Sllovenia dhe Irlanda i kanë kërkuar Bashkimit Evropian të diskutojë pezullimin e marrëveshjes së asociimit me Izraelin , tha sot Ministri i Jashtëm spanjoll Jose Manuel Alvarez përpara një takimi të ministrave të jashtëm të BE-së në Luksemburg.
“Spanja, së bashku me Slloveninë dhe Irlandën, kanë kërkuar që pezullimi i Marrëveshjes së Asociimit midis Bashkimit Evropian dhe Izraelit të diskutohet sot“, tha Álvarez.
Kujtojmë se ky veprim u njoftua disa ditë më parë nga kryeministri spanjoll Pedro Sánchez.
“Këtë të martë, qeveria spanjolle do t’i paraqesë Evropës një propozim që do të parashikojë që Bashkimi Evropian të anulojë marrëveshjen e asociimit me Izraelin”, sepse një qeveri “që shkel ligjin ndërkombëtar nuk mund të jetë partnere e Bashkimit Evropian”, tha Sanchez gjatë një tubimi parazgjedhor në Andaluzi të dielën e kaluar.
Marrëveshja e asociimit midis Bashkimit Evropian dhe Izraelit, e cila hyri në fuqi në vitin 2000, përfshin një klauzolë që lidh marrëveshjen me respektimin e të drejtave të njeriut.
Spanja e vuri në pikëpyetje për herë të parë këtë marrëveshje në shkurt të vitit 2024, kur Pedro Sanchez dhe kryeministri i atëhershëm irlandez i dërguan një letër të përbashkët Komisionit Evropian. Kjo letër kërkonte një vlerësim të respektimit të detyrimeve të Izraelit për të drejtat e njeriut pas fillimit të luftës në Gaza.
Që atëherë, Sanchez e kishte forcuar gradualisht qëndrimin e tij për këtë çështje, veçanërisht në lidhje me luftën në Liban, deri në njoftimin e sotëm.
