Qeveria britanike po planifikon të vendosë me ligj kufizimin e përdorimit të telefonave në shkolla në Angli, si pjesë e projektligjit për mirëqenien e fëmijëve dhe arsimin.
Ministrja e Arsimit, Baroness Jacqui Smith, deklaroi në Dhomën e Lordëve se qeveria do të paraqesë një amendament që krijon “një detyrim të qartë ligjor për shkollat” në lidhje me telefonat.
Sipas Departamentit për Arsim (DfE), masa synon t’i japë fuqi ligjore praktikave që shumica e shkollave tashmë zbatojnë, duke i bërë ato të detyrueshme. Më herët, sekretarja e Arsimit, Bridget Phillipson, kishte udhëzuar shkollat të jenë “pa telefona” gjatë gjithë ditës.
Qeveria thekson se kjo nuk përbën një ndalim absolut me ligj, siç kanë kërkuar konservatorët, por vendos udhëzimet ekzistuese në një kornizë të detyrueshme.
Nga ana tjetër, konservatorët e kanë përshëndetur këtë hap. Sekretarja në hije për arsimin, Laura Trott, e cilësoi vendimin si “lajm fantastik” për drejtuesit e shkollave, prindërit dhe nxënësit, duke shtuar se kjo do të ndihmojë në përmirësimin e sjelljes dhe rezultateve në mësim.
Detajet e amendamentit nuk janë publikuar ende, por qeveria ka lënë të hapur mundësinë për masa më të forta, si ndalimi i plotë i përdorimit të telefonave gjatë orarit mësimor. Disa shkolla tashmë përdorin dollapë apo qese të mbyllura për ruajtjen e tyre.
Ndërkohë, Liberal Demokratët kërkojnë që qeveria të sigurojë financim dhe mbështetje për shkollat, për të menaxhuar këtë tranzicion.
Autoritetet arsimore theksojnë se shumica e shkollave tashmë kanë politika ndaluese për telefonat dhe se zbatimi i tyre do të monitorohet edhe nga inspektimet e Ofsted. Ligji konsiderohet si një nga nismat më të mëdha për mbrojtjen e fëmijëve në dekadat e fundit, ndërsa qasja ndaj telefonave në shkolla vazhdon të ndryshojë në pjesë të ndryshme të Mbretërisë së Bashkuar.
