Këngëtarja Madonna ka bërë të ditur se kostumi vintage që veshi gjatë festivalit Coachella është zhdukur dhe ka bërë thirrje për rikthimin e tij “në mënyrë të sigurt”.
Interpretuesja e hitit Like A Virgin u ngjit në skenë të premten së bashku me yllin e popit Sabrina Carpenter gjatë fundjavës së dytë të festivalit muzikor në Kaliforni. Ajo kishte veshur një trupore korseti ngjyrë vjollcë vintage, të kombinuar me çorape vjollcë dhe doreza ngjyrë livando. Në skenë, Madonna tha se ishte “i njëjti korset, të njëjtat çizme dhe e njëjta xhaketë Gucci” që kishte veshur në paraqitjen e saj të parë në Coachella në vitin 2006.
Pas performancës, këngëtarja zbuloi se pjesët e kostumit – përfshirë xhaketën, korsetën dhe një fustan – kishin humbur. Ajo publikoi një mesazh në “Instagram Story”, duke ofruar një shpërblim për këdo që do të ndihmojë në rikthimin e tyre.
“Ende po fluturoj nga emocioni që nga e premtja në Coachella. Faleminderit Sabrina-s dhe të gjithëve që e bënë të mundur. Ishte një emocion i veçantë ta sillja Confessions II atje ku gjithçka filloi,” shkroi ajo.
Madonna shtoi se momenti i veçantë u zbeh kur zbuloi se pjesët vintage që kishte veshur kishin humbur. “Kostumi im i marrë nga arkivi personal – xhaketa, korseti, fustani dhe pjesë të tjera – janë zhdukur. Këto nuk janë thjesht rroba, janë pjesë e historisë sime,” u shpreh ajo.
Këngëtarja tha se shpreson që dikush t’i gjejë dhe të kontaktojë ekipin e saj, duke shtuar: “Ofroj një shpërblim për rikthimin e tyre të sigurt. Faleminderit nga zemra.”
Gjatë performancës në festival, Madonna dhe Sabrina Carpenter interpretuan disa nga hitet e saj të njohura si Vogue dhe Like A Prayer, si dhe një këngë të re nga albumi i ardhshëm Confessions II.
Albumi, që do të publikohet më 3 korrik, do të jetë albumi i saj i 15-të në studio dhe vjen pas suksesit të albumit fitues të Grammy-t Confessions on a Dance Floor të vitit 2005, i njohur për hite si Sorry dhe Hung Up.
Madonna nisi karrierën e saj në vitet 1980 dhe gjatë dekadave ka fituar një sërë çmimesh, përfshirë shtatë Grammy dhe dy Brit Awards. Ajo ka pasur 13 këngë në vendin e parë në Britani dhe 12 albume që kanë kryesuar listat.
