Një sulm iranian me raketa dhe dronë ndaj një baze ushtarake në Arabinë Saudite ka plagosur 12 trupa amerikane, dy prej tyre në gjendje të rëndë, thanë dy zyrtarë amerikanë. Sipas tyre, sulmi dëmtoi rëndë edhe të paktën dy avionë furnizues ushtarakë KC-135 dhe përbën një nga goditjet më serioze ndaj mbrojtjes amerikane që nga fillimi i luftës me Iranin.
Ndërkohë, luftimet në rajon janë intensifikuar teksa konflikti hyn në javën e pestë. Ushtria izraelite njoftoi se ka nisur një valë të re sulmesh ndaj Teheranit, ndërsa Irani ka lëshuar raketa të tjera drejt Izraelit. Tensionet u rritën edhe më tej pasi një raketë u lëshua drejt Izraelit nga Jemeni, në një moment kur rebelët Houthi, aleatë të Iranit, kanë paralajmëruar hapjen e një fronti të ri nëse lufta zgjerohet.
Ndërkohë nuk ka ende shenja për një marrëveshje që do t’i japë fund konfliktit që nisi më 28 shkurt, kur SHBA dhe Izraeli goditën Iranin. Sekretari amerikan i Shtetit, Marco Rubio, deklaroi se SHBA mund të arrijë objektivat pa përdorur trupa tokësore dhe se lufta mund të përfundojë brenda javësh, ndërsa Teherani nuk ka reaguar zyrtarisht ndaj planit të paqes të propozuar nga presidenti Donald Trump.
Situata mbetet veçanërisht e tensionuar edhe për shkak të ngushticës së Hormuzit, një nga rrugët më të rëndësishme për furnizimin global me naftë dhe gaz, të cilën Irani e ka bllokuar si kundërpërgjigje ndaj sulmeve të SHBA-së dhe Izraelit. Trump ka paralajmëruar se nëse Irani nuk e rihap kalimin për anijet, do të përballet me sulme të reja.
