Në pamjet që regjia e Partisë Socialiste ka nxjerrë për mediat nga mbledhja e Grupit Parlamentar, duket se gjithçka është menduar me kujdes: kë të tregojë kamera, kë të lërë jashtë dhe… ku të vendoset secili në sallë. Mes këtyre detajeve të kuruara, bie në sy edhe pozicioni i Elisa Spiropalit.
Ish-kryetarja e Kuvendit dhe ish-ministrja e Jashtme nuk rezulton të ketë qenë mes figurave kryesore në rreshtat e parë. Përkundrazi, ishte sistemuar diku në fund të sallës, në një rresht të qetë ku shoqërinë ia bënte Zegjine Caushi.
Sigurisht, në politikë vendet në sallë janë gjithmonë çështje “organizimi”. Por ndonjëherë organizimi flet më shumë se fjalimet. Sidomos kur bëhet fjalë për një deputete që pak ditë më parë vendosi të mos paraqitet në seancën ku votohej imuniteti i Belinda Ballukut, duke dalë nga rreshti i disiplinës së grupit.
