Pensionistët nuk do ta marrin bonusin e pranverës gjatë muajit shkurt, ndryshe nga sa ishte premtuar më parë nga kryeministri Edi Rama. Burime nga Instituti i Sigurimeve Shoqërore bëjnë me dije se shpërndarja e shumës do të kryhet në mars për shkak të procedurave të brendshme, të cilat kanë penguar lëvrimin në kohë të pagesave.
Fillimisht, qeveria kishte deklaruar se bonusi prej 15,000 lekësh do të jepej në shkurt, pa pritur zgjedhjet. Por, siç ndodhi edhe në dhjetor, ndarja e pagesave do të bëhet sipas një grafiku të përcaktuar nga ISSH, që administron të dhënat e çdo përfituesi.
Nga kjo mbështetje financiare do të përfitojnë jo vetëm pensionistët, por edhe familjet që trajtohen me ndihmë ekonomike, personat me aftësi të kufizuar dhe kategori të tjera që marrin pensione sociale. Në total, qeveria ka akorduar 6.3 miliardë lekë për këtë paketë mbështetëse, pas ndryshimit të tretë të buxhetit të vitit të kaluar.
