Xhusepe Verdi, kompozitori i famshëm italian, ishte pranë publikut shqiptar në 4 mbrëmje të shkurtit (6, 8, 10 dhe 12) në të cilat trupa artistike e TKOBAP solli për artdashësit operën “Aida”. Nën dirigjimin e Serxho Alapontes dhe me produksion të Franko Xefirelit, artdashësit në Tiranë shijuan muzikën magjike të Verdit, për të cilin është thënë se është ai kompozitor që ia ka arritur të përshkruajë me anë të notave muzikore të gjitha emocionet që përjeton njeriu. Opera me katër akte që flet për dashurinë dhe luftën, për përballjen e ndjenjës së dashurisë me detyrën ndaj atdheut, ka një përfundim tragjik. Dy të dashuruarit, protagonistët e historisë, bij të vendeve në luftë – Egjiptit dhe Etiopisë, varrosen të gjallë. Ai vuan dënimin, sepse për shkak të dashurisë për Aidën tradhtoi vendin e tij. Ajo me vullnetin e saj bashkëvuan dënimin e Radamesit, sepse për hir të atdheut të saj shtyu drejt tradhtisë të dashurin e vet, duke tradhtuar besimin e të dashurit të saj. Gjithmonë tradhtia është konsideruar akt i shëmtuar, pavarësisht motivit, dhe prandaj ka gjetur edhe ndëshkimin. Në ditët e sotme në Shqipëri kur tradhtia, sidomos ndaj interesave të vendit dhe të shtetit, është shndërruar në një përditshmëri, vepra të tilla si “Aida” të risjellin në mendje tragjizmin që ajo prodhon. Sidomos kur shoqërohet me fuqinë e notave të kompozuara nga Verdi.
Pra, TKOBAP i dhuroi një tjetër shfaqje artistike të këndshme qytetit të Tiranës. Këtë herë bukuria e shfaqjes çuditërisht të shoqëronte pas, kur e lije sallën e shfaqjes dhe tek ecje në sheshin “Skënderbej”. Sheshit këto ditë i kish rënë një nur qetësie mondane.
