Kancelari i Gjermanisë, Friedrich Merz, vizitoi Shtëpinë e Bardhë për një takim dypalësh me presidentin amerikan Donald Trump, në takimin e tyre të parë ballë për ballë, zhvilluar në një kohë me sfida të shumta ndërkombëtare.
Takimi nisi me një shtrëngim duarsh përpara kamerave, ku Trump e përgëzoi Merzin për zgjedhjen në postin e kancelarit dhe shprehu dëshirën për “një marrëdhënie të shkëlqyer” mes SHBA-së dhe Gjermanisë. Merz i dhuroi Trump-it një dhuratë simbolike, certifikatën e lindjes së gjyshit të tij të kornizuar.
Gjatë bisedimeve, u theksua rëndësia e bashkëpunimit ekonomik dhe politik. Trump theksoi se do të kërkojë një “marrëveshje të mirë tregtare me Gjermaninë”, duke shtuar se kjo do të varet edhe nga Bashkimi Europian. Ai gjithashtu shprehu kënaqësinë për rritjen e shpenzimeve ushtarake nga Gjermania dhe garantoi se trupat amerikane do të mbeten në vend, pavarësisht shqetësimeve për tërheqje.
Numri i rreth 45,000 ushtarëve amerikanë në Gjermani u cilësua nga Trump si një faktor ekonomik pozitiv për vendin, duke theksuar se ata janë “të paguar mirë dhe shpenzojnë shumë.”
Një pjesë e rëndësishme e takimit u fokusua në konfliktin në Ukrainë. Trump shprehu keqardhje për luftën dhe u shpreh pesimist për një marrëveshje midis Rusisë dhe Ukrainës, duke thënë se “nuk besoj se do të nënshkruajnë ndonjë marrëveshje.” Ai gjithashtu tha se është i gatshëm të vendosë sanksione të reja ndaj Rusisë në rast se konflikti vazhdon.
Nga ana e tij, kancelari Merz theksoi nevojën për përfundimin e luftës dhe nënvizoi bashkëpunimin e vazhdueshëm mes SHBA-së dhe Gjermanisë në mbështetje të Ukrainës. Ai kujtoi përvjetorin e zbarkimit në Normandi, duke falënderuar SHBA-në për rolin e saj historik dhe aktual në mbrojtjen e lirisë dhe sigurisë në Evropë.
Takimi u zhvillua në prani të zv/presidentit amerikan J.D. Vance dhe sekretarit të Shtetit Marco Rubio, duke reflektuar rëndësinë e marrëdhënieve SHBA-Gjermani në një periudhë sfidash globale.
